到底敢欲取消早自修或者是朝會，最近引起討論。台北市立成功高中經過校務會議討論了後，決定攏取消，學生8點10分進前到學校就會當，這陣台北市立松山高中經過討論也調整上課時間，拜一佮拜五兩工8點10分進前到，其他三工7點40進前到。而且鼓勵學生參加朝會，會當抵愛校服務，也通銷警告，三月正式實施。

臺北市立松山高中學務主任，張洸源表示：「其實本來逐家的意見就無啥仝款，但是阮有佇校務會議有討論講，政策法令的改變，咱會使閣討論，只要會使予學生，學習的狀況愈來愈好，咱來拍拚努力按呢。」

臺北市教育局中等教育科科長，黃喬偉表示：「學校內底一定愛有共識，若用按呢鼓勵學生囡仔參加，當然學生彼爿嘛是會當認同，學校嘛會使認同，基本上就會使按呢行。」

教育局表示尊重學校校務會議和民主程序的決定。民間團體肯定予學生靈活運用第一節課進前的時間。不過有完全中學校長表示，國中和高中到學校時間無統一，老師歹管、也可能有安全問題。

新北市立安康高級中學校長，謝金城表示：「有的學生伊的較早來，伊來嘛是佇教室參加自主學習，無老師的時陣，學校的行政人員閣無啥夠，所以這个時陣就會造成學生安全的問題。」

社團法人臺灣青年民主協會理事長，張育萌表示：「廢除以後，足濟學生嘛是提早來，這馬有足濟微課程、社團，足濟的安排愛學生家己的時間。」

教育部預計三月公佈新的國中和高中作息規範，台北市教育局表示尊重中央新規範出來，才來因應調整。